腎病貓護理-打皮下水

為腎病貓打皮下水係腎病貓護理其一必經階段,

 我第一次打皮下水係3年前為妹頭打, 

妹頭曾係cccp流浪貓, 可能因為信任我, 不算太難處理, 

但妹頭不肯接受force feed任何食物、水, 每隻貓不同，只能盡力賞試。

來到今天, 我早、晚幫肥仔打水，

肥仔剩下的日子不多了，樂觀的也只有以月計的日子,

 但牠仍是肥仔，在我護理下沒有瘦到, 不是浪得虛名, 

有7kg以上, 可惜外強中虛, 兩個月前驗血去到腎衰三期(的中期), 

現時已急速衰退, 可能到三期(的末期)、甚至四期。

上年暫托的巨腸症老貓, 在我家活了13個月才離世, 

比原估計兩星期賺了很多, 後期的護理的確令我疲累。

休息了一個多月, 我幫cccp義工接手一隻在街生活了約14年的老貓，

因為受傷、消瘦被捉留院, 出院後需要護理, 無處可去, 

義工在家照顧了一個多月，情況不斷惡化，打唔到水, 血尿不停, 

我嘗試接手善終，已經近4個月, 

在不斷嘗試後，兩個月前已能一人獨力打水,

 老貓暫時情況穩定, 雖然血尿仍不斷，

睇過多次醫生、檢查、化驗, 不能係源頭止血, 

只能希望外來輔助品趕得上流失, 見步行步。

除了勇氣, 打水時我借助了頭罩、毛巾, 肥仔當然不需要這些輔助品,

下針前, 貓仍會咆哮、fee、掙扎, 下針後會鎮定下來。

將水吊高有助落水速度、穩定, 家中如果搵唔到適合位置吊水, 

可以用浪衫的丫叉吊水, 將丫叉綁在可以依靠的地方, 

我將丫叉綁在籠邊, 方便我放貓入籠打水。

腎衰竭護理

我養的貓和不同腎病扯上關係, 由10年前照顧卡樂b的PKD開始，幾乎沒有停止過照顧腎病貓, 這普遍困擾老貓的衰老病。

10年來醫生用藥和市面上可以購買的supplements不斷變化、增多, 花多眼亂，我加入FB有關群組, 最後選擇少Ｄ睇, 各人七嘴八舌, 要花心神時間從中挑選、總結各意見, 不太適合我。

10年前醫生處方Fortekor俾卡樂b, 到最後半年加入Azodyl, 卡樂b由確診PKD(Polycystic Kidney Disease)至離開活了4年半, 從不需要打水也沒有缺水, 靠佢自已大量飲水, 一隻令我到今天想起仍會流淚的貓博士。

妹頭患的是腎石, 腎石鬆脫由腎臟跌落輸尿管(不是尿道), 一邊輸尿管塞了, 住院、腎糧、打水、止嘔藥、開胃藥, 頂了3個半月, 現時有較多獸醫可以做到搭橋手術，但貓貓不一定能在手術後恢復腎功能。

細b腎衰竭有可能服用類固醇兩年抑壓淋巴癌導致, 由確診至晚期也只是3個半月, 期間曾量血壓，沒有超標, 不需要服降血壓藥。

細佬(15歲, 確診10個月, 由腎衰竭三期頭好轉至二期尾))、暫托老貓(16歲, 剛確診腎衰竭三期)現時除了腎糧, 未需要打水, 我自已給牠們服用以下supplements(只供參考)。

• 腎興(台灣, 包含蟲草和其他中藥), 每曰兩次, 服用活腎炭之後兩小時才服用, 細佬每日1000mg, 暫托老貓每日500mg
• 活腎炭(日本), 每餐之後即服用, 細佬每日6粒，暫托老貓每日3粒
• 維他命B12, 每曰兩次, 服用活腎炭之後兩小時才服用, 細佬、暫托老貓每日500mg
• MiraLax, 溝入濕糧, 細佬每日一次(<1g)、暫托老貓每日兩次(>1g)

我的選擇係根據自家貓的狀況和自已的分析, 腎衰竭是不能逆轉，所做的只是延緩衰退和補助所缺或減少所害, 

選擇腎興不是單一蟲草, 是從中醫保健角度, 單一中藥有其不足, 希望腎興中的各種中藥能產生協同效應，延緩衰退, 這是西藥不能提供的。

選擇活腎炭, 其原理和Azodyl一樣, 但有測試數據支持，係腸內吸收creatinine/urea, 令流入血液的creatinine/urea減少，減輕腎臟負擔, 減少所害。

維他命B12幫助製造紅血球，因為牠們的血色素都比正常低, 補助所缺。

細佬三日前的驗血, creatinine 下降至比10個月前低, 希望能繼續延續一段時間。

預約的再見

今日帶細b見醫生，症狀顯示細b腎臟已經失去功能，

口腔大面積潰瘍，已經沒有什麼可以做的，

我選擇了止痛藥、止嘔藥，

向醫生表示我會停止化療藥、類固醇，

因為攞佢命的不會是癌症、係腎衰竭，

含淚約了醫生另擇日子送別細b，我係時候放手。

昨晚細b大嘔吐，吐出晚餐、藥、水，接著肚痾，

我之後冇再餵食，

too stressful for her and me,  只餵了些少水。

爸爸話細b一生很幸福，

唯一不幸是遇上肥仔呢隻惡霸, 間中被打。

其實自6月中轉用處方腎罐之後，細b已經停止自己進食，

開頭可能不喜歡腎罐，盡管買齊市面上所有味道的腎罐，

之後應該已經沒有胃口，

只靠我每日兩次將腎罐加水打成mousse 狀，用針筒餵。

由2017年頭確診心肌肥大症到2018年8月確診淋巴癌，

佢一一捱過，心臟病到今日不用食藥，

化療、服用類固醇兩年多沒有一日停止過，

雖然淋巴癌已算康復，正當開心之時，腎衰竭突襲，

而且很急，只是三個月時間，

雖然每日服用多種中藥、西藥、打水亦不能減慢惡化速度，

醫生話長服類固醇對其腎臟、心臟也有一定影響。

見完醫生回家, 給細b索下貓草減壓，

外表上, 唔似一隻要再見的毛孩,

細b, 媽媽不捨放手, 但都要放手。

肥仔也在6月確診腎衰竭, 轉食處方罐、糧, 加上服用中藥、supplements, 情況暫受控, 但餓底戰鬥力大不如前。

貓咪巨腸症

本來因為各種原因不想再update此blog,

 但最近的經歷令我覺得blog仍有其存在價值。

我上個月未開始暫托一隻十五歲高齡周身病被主人棄養的貓，

只想在牠最後的歲月（開頭預測只有一至兩星期壽命）給牠愛心，

這貓除了長期遺傳病患之外，

最直接令其生命危在旦夕是巨腸症，

患有巨腸症的貓會有排便困難，

嚴重到要麻醉通腸，

我暫托的貓得到好心人贊助通腸，

但通完腸之後沒有去路，被領養機會幾乎零。

離開診所後，醫生開了cisapride, lactulose, 腸胃處方濕糧，

來到我家寧養，盡做，有幾多日子就幾多。

開頭幾天一日排便可以10次，每次些少，其實是將積聚多時的大便排出，

因為要用力排便，每次痾完之後，貓貓會瞓低休息，有時甚至嘔吐。

經過一星期後，排完累積的大便，

又有新便累積，再次出現排便困難，食、瞓不安樂，

總不能又去診所麻醉通便，不能治本，

打針送走成為一選項。

正在頭痕，想起一blog友很久之前提及她的貓有長期便秘問題，

試過吐毛膏，醫生開的酵素都不能解決問題，

最後一朋友建議用miralax才解決問題，
即聯絡blog 友，又打電話俾幫趁的藥房，藥房已經沒有出售，

由海外網購要一星期到貨，最後向一本地網店購得。

這正是我恢復寫此blog的目的，不知何時何日有人在無助時，

能從網上找到同患此症的簡單療方之一。

試了多日，不敢太早斷言便秘問題已解決，

但的確有好轉，我亦正試驗那一份量最適合貓貓。

後記：Miralax效果不錯, 份量因貓而異, 要慢慢調校, 同時服用cisapride, lactulose, 因為病情嚴重，但出現長期服用大量Miralax的副作用, 反胃作嘔, 經常嘔黃膽水 

8/12/2020: 已經半年，暫托貓仍生存, 慢慢調較後, 逐漸減少cisapride, lactulose, 現在只靠Miralax 都能排便

除了暫托，我也會按自己興趣參與其他義務工作和照顧細b,

 細b戰勝了淋巴癌、心臟病也算穩定，但敵不過老貓的宿命，

已經有三至四期的腎衰竭，因為本身已吃緊化療藥、類固醇，令治療更複雜困難，

這幾天完全靠我用針筒餵腎濕包、加上打水、食probiotics，

希望下星期覆診指數有下跌，到時同時量血壓(多不準確, 因為貓外出太緊張)、小便種菌(因為幾日前小便發現有紅、白血球),
可以做的不多，

入院吊鹽水清洗毒素只是短暫手段。

後記：細b在緊張狀態下的血壓在140-150mmHg, 暫時不用吃降血壓藥
細b腎指數有改善，我仍找尋更好的療方

細b淋巴癌...「康復」

想寫此篇blog好耐，懶開有條路，

以下純分享我由獸醫所收到的訊息，

不能取代獸醫的診斷、意見，

只能給貓友參考，不幸碰上時也不會不知如何處理

怎樣發現細b患上淋巴癌?

細b自多年前確診心肌肥大症後,

就需要每半年照一次心臟超聲波、驗血以睇吓惡化程度，

以決定要否服藥以舒緩不適，令牠繼續有生活質素，

醫生也會數下呼吸次數、摸下身體各部位，

當醫生摸到下巴時，發現牠淋巴腫脹，懷疑係淋巴有事，

問我會考慮抽針化驗，抽針化驗結果懷疑是淋巴癌,

但不能100%肯定，醫生建議要肯定的話，

就要麻醉割後腿後的一粒淋巴去做biopsy, 

biopsy結果確定係淋巴癌

淋巴全身都有，即任何位置、器官亦有可能有淋巴腫瘤，

細b除了下巴兩側腫脹，後腳、胸部奶頭附近亦有淋巴腫脹，

基於年紀老邁，醫生建議用較溫和的方式延長壽命、

舒緩不適，可以化療

淋巴癌化療藥有兩種（note:不同癌症可能用不同的化療藥）

• 定期到診所打化療針; 或
• 定期（每三星期）在家餵化療藥（note: 化療藥是毒藥，不可直接用手接觸，帶一次性手套才餵）: 加上
• 每日服用類固醇抑制免疫系統

因應貓性格、年紀等選擇用一方式化療

定期驗血以確保紅血球能夠支持化療，

如果紅血球、血色素過低，要停止化療，

如果病情穩定, 驗血的頻率可慢慢拉長,

由開始時每一兩星期至現在約三個月一次

貓的化療副作用有別於人, 不會甩毛、口腔潰爛,

只會很疲倦，成日訓

胃口也可能受影響, 細b經常罷食, 需要用針筒強餵,

如果只靠貓自已進食，可能不能維持體重, 

也不能製造足夠紅血球去抵禦化療

細b已化療一年半, 今個月初的覆診醫生話已康復，

身上淋巴已不再腫脹

但終身要繼續服用化療藥和類固醇, 因為怕復發

一般貓在化療頭幾個月效果較明顯, 

但細b一路對化療沒有大反應, 只是淋巴腫瘤大小維持不變,

化療一年後才慢慢縮小, 不要太早下判斷

照顧老貓的小小心得

紅、黃色暴雨警告下, 最好在家寫blog做紀錄,

與家有老貓blog友交流下, 互相學習，

細b有病在身, 仍肯自己進食，但胃口時好時壞, 

多數自己吃一半, 一半靠我強餵,

為了方便用大針筒(60ml)強餵, 一定要先將食物打成蓉, 才能用針筒餵,

我用此種攪拌機, 馬力400w, 太細馬力打得不夠爛,

晚餐有吞那魚罐頭、水, 蒸雞柳碎、南瓜蓉、lysine powder, taurine powder, 

打一分鐘左右就成蓉, 要用矽膠抹刀划出, 如果唔係, 會殘留很多蓉在攪拌容器

細b吃唔晒, 要再加少量水稀釋, 用針筒吸完強餵

不要以為市面上有些罐頭寫明 xxxxx paste 可以直接用針筒餵,

事實上所謂paste 的肉醬是粗粒, 針筒不能直接吸入,

早前餵妹頭Hill's K/D 腎罐 paste with chicken 也先要加半罐水溝, 用細網篩加匙羹磨,

隔完的濃液才能用大針筒餵, 但妹頭從不吃濕糧, 只餵了一大罐就轉回Renal Liquid,

60ml 大針筒不是間間藥房有得賣, 藥房多只賣25ml 或以下針筒,

大針筒吸咀分兩種，一種如圖下左邊, 窿口較大，

另一種方便插針, 窿口較細, 不能用作餵食用,

圖下右邊是我在FB見到有朋友使用, 是擠奶油用,

買來一試(係citysuper 用$80 買完, 先發現taste有類似的$38),

好處係不用將食物磨成冇渣的蓉, 罐頭paste 加水攪完可以直接倒下圓筒使用,

但操作上沒有針筒咁利落，

可能我先入為主，已習慣用大針筒

廚餘清道夫

有位老伯任職廚餘清道夫多年，由年輕做到老，

餐揾餐食，冇乜儲蓄，

想轉份有多d保障既工好耐，但點同後生仔女爭，

每天在網上求包養的多不星數，要後生的有，要靚仔過佢有，

只能怪少壯不努力 老大徒傷悲

現時顧主對老伯好刻薄架，每日兩餐，

早餐只有25g冇貓肯吃的剩餸，唔使半分鐘清晒，

一日時間流流長，要等到晚上才有嘢落肚，

晚餐80g 細罐加水填飽肚子直到第日早上，

其他時候睇運數，時運高時有些廚餘打賞，老伯視之為甘露，飛撲去清潔,

鬼叫年紀大先諗轉工，邊話咁易，

貓界勞福局長建議肥嘢搵貓奴介紹署試下換顧主，

個個貓奴一聽到13歲高齡，見到個樣蠢蠢頓頓, 又見佢CV有多次打交紀錄, 邊冇貓奴肯落搭，

於是肥伯自拍此宣傳短片希望有貓奴垂青佢的認真工作態度，

連在地上的一小點廚餘也清潔頗當，貨真價實