十年後重遇

(寫於法蘭克福機場)
細b三個月內右耳發炎覆發三次，最近一次不幸發生在我出門遠行前兩日，簡直倒瀉落蟹，早上出門返工前發現覆發，明明三天前洗耳，當時仍一切正常，短短三日就發展到有液體流出耳朵，早上即打電話去各診所預約，結果是全滿，最快要第二天，我不能等，後天就要離港，只好一試十二年前幫細b絕育的診所, 有位攝，當天唯一當值醫生竟是當年幫細b絕育的醫生，即攞假帶婆婆睇醫生。

見了醫生，我問醫生點解十年冇轉工，醫生被我這樣一問，笑答就快要轉工，醫生開了另一款滴耳水和三日類固醇控制細菌繁殖，並取辦種菌，滴耳水起碼要連續滴兩星期，知道鐘點沒有能力做，她對住細b8年，至今不敢掂佢，佢對肥仔和走咗嘅卡樂b就冇問題，我提出住院，醫生拒絕，認為不能只為滴耳水困細b十多日，醫生主動提出明天幫我致電我家附近診所，要求幫忙滴耳水，要收費，但我家鐘點要帶細b去診所，鐘點話沒有信心可以捉細b入袋，我頭都大晒。

回到家不知如何拆解今次危機，好在平時有留意cat sitter資料，雖然用不著我會留下，pm cat sitter, 幾小時冇回覆，硬著頭皮找一貓友可否幫忙暫托細b，再試找多兩位網上search到的cat sitter, 一個冇回覆，一個話新年期間接了13單生意，冇能力再接，最後用另一方法找到最初pm個位，她坦言也爆晒，接唔到，但肯幫我問其partner, 又再等待……，等到晚上十一時終有回覆，酬金是正常兩倍以上，時間要遷就佢，我答應，實在不想勞煩貓友，結果搞到零晨一時才能去瞓覺。

同cat sitter 電話溝通時，我多口問見佢fb有某個慈善動物團體的posting, 問佢是否該團體義工，正是義工也，我告知約十年前曾參觀該團體收留貓貓的單位，她問我是那位義工帶我去（因為貓屋不是對外開放），我竟然記得該義工之名，而她正是10年前帶我上去貓屋參觀的義工。

一日內將十年沒有見面的兩人再因為貓連接起來。