巨籠

這巨籠將會是狗狗未來幾個月休息之所，非常巨大，40x30x27吋, 可容纳100磅大狗,

超乎我想像，肥仔入內視察，也只是細細粒。

下個月將會開始繁忙的育狗生涯，

需要犧牲一些個人的活動、社交去遷就，希望能順利完成任務。

最近貓事多多，不知為何細b、肥仔突然痾嘔，大便好臭，
是肚痾有惡菌那種臭，不是腸胃消化有毛病那一種,

費解？日常沒有改變，仲要兩貓同一症狀，

唯一是剛換了一款郵購的牙膏，即停用，用自己的醫治方法，兩日後恢復進食，大便也回復正常，

但一痾兩日，肥仔體重竟由6.2kg 跌到5.9kg, 嚇到我！

決定終止肥仔接近兩年冇飽飯吃的減肥生涯，

佢已超過11歲，一病兩日體重大跌，

決定幫佢維持6kg 體重，有些少儲備，以防將來有病時有buffer.

另外上星期發現肥仔右耳有輕微發炎跡象，即用細b上年用剩的耳炎藥水醫治，

幾天後發現肥仔近年經常流淚水的情況幾乎痊癒，

我突然聯想到肥仔年頭右眼腫脹，拒絕進食其實是耳炎漫延到眼、口，照CT 是怨枉了，

早幾日鏗鏘集講公立醫院的醫生工作流水作業，每位病人只有幾分鐘時間，根本沒有可能好好症治，

其實獸醫也是一樣要跑數，對不懂說話的毛孩也多是快快斷症，
經此體會往後自己對毛孩的觀察更加重要，不能太依賴獸醫的斷症。

細b婆婆老貓病

婆婆自兩年前開始出現各種感染，由雙耳發炎，反反覆覆搞了大半年才康復，

再來皮膚敏感（我懷疑當時係癬患），又醫咗半年，

到今年初癬患，用 medicated shampoo 沖了超過十次涼才康復，

每次沖涼、浸藥水、吹乾搞好耐，

最近又患上cat flu, 流鼻涕、眼水、鼻塞，兩天冇吃嘢，

擔心引發併發症，看完醫生，吃抗生素加上supplements, 現大致康復

P.s. 早前暫托兩隻貓女，一隻上個月已被領養，

另一隻較弱的在我家逗留了近兩個半月，昨天早上回中心，傍晚已被領養，

短暫托導亡犬已回家，遲些會有一狗b來，今次要托到佢一歲大才離開展開正式訓練

興趣的東西很難預測，離開職場後去學有機耕種，

打算在家搞下花臣，學完先知不簡單，不會在家實驗啦，

學完後的收成只有兩柱菜，這興趣只有三分鐘熱度🤣

打皂有8年，一向只自用，用blender 打，

雖偶有些小氣泡瑕疵，不影響功能，但省力、時間，

除剛學時玩下渲染、各種不同材料、浸花油花臣，

一早回歸基本，只用幾種常用的油，

我不太相信一些營養物質可以在幾分鐘沖涼時經皮膚吸收

近來去學冰皂，老師教用手打，我回家試用手打咗幾次，

又開始偷懶試用機打，效果又不太差

上一篇blog留言恕不回覆, 想回覆，每次也太沉重不能繼續

入屋兩週年

兩年前的今天，妹頭帶著一身未痊癒的刀傷來到此家開始休養，

記得咁清楚，因為卡樂b在妹頭到步前一個月走了，

兩年來未能忘懷.

短短幾十字, 我要分三次寫,

手機wallpaper仍是卡樂b, 每次講起、想起牠, 仍是雙眼通紅。

攝於離開前一個月，完全不像患病4年半的腎病貓，
到走時從未需要打水, 但完全沒有脫水情況，
全靠自己好生性不停飲水，怎能忘記牠.............

Moonwalk

沒有慢鏡，正常速度放影，好好笑,

細b婆婆第一次見到狗狗的反應,

肥仔、妹頭呢?

匿在梳發底，兩隻餓鬼連開飯也不出來，

要我送外賣到梳發底, 

陰公猪, 肥仔一世未試過咁委屈在梳發底十幾個鐘唔敢岀來。

3.8kg 肥妹

妹頭雖然得3.8kg, 仲輕過細b少少，但骨架細，

成隻圓碌碌，見唔到、摸唔到有骨。

每日兩餐，每餐只給牠17g 減肥糧, 仲要用電子磅量度，

17g 有幾多，少得可憐，

暫托貓女每餐最少30g, 任食，因為要增肥變靚D，

肥仔每餐也只有约20g , 但會吃濕糧，

妹頭不肯吃濕糧，缺少一隻腳，令佢活動能力大大減少，

加上開始步入中年(约7歲)，越來越難控制佢體重。

10號風球下的肥仔

一早起身肥仔好忙，忙於在室內追逐門外飛躍的樹葉,

撲來樸去, 暫時放下護衛員工作

細b照舊大覺瞓

哈哈............妹頭一早在梳發底避風

導盲犬

考慮一排，決定申請做導盲犬暫托家庭，

等待家訪評核適合與否，

如接納，將開始繁忙訓練，亦需要減少其他活動。

未養過狗, 白紙一張，由零開始，

相信學到的知識對將來如收養、暫托狗隻非常有用。

細b覆診

半年過了, 又到細b心臟病覆診，

結果是稍為嚴重了，

醫生沒有即時開藥舒緩，

要求我不時自己監察佢睡眠時的breath rate, 

不是心跳率, 是肚皮上上落落次數, 

如果超過每分鐘30下, 是時候回診所見醫生,

如我所料, 上月尾體重已跌破4kg, 肌肉流失，身體吸收緩慢,

同樣食量, 也逐漸消瘦,

佢近來已接受現實, 不再勉強一下跳上床, 多用咗凳仔上床,

癬患搞了三個多月, 己接近康復

恢復俾靈芝、淮山杞子水俾細b食

妹頭每日34g糧, 都可以肥到3.8x kg, 肥仔停留左在6.4x kg,

要諗下點幫妹頭減肥

貓子開大口

嘩！好得人驚！肥貓發惡！

獅子開大口，嬲得佢吖，有冇兩吋寛？

又嚇貓囉！

男女有別

個個知道肥仔對來我家暫住的過客貓一向不客氣，

為了不太影響肥仔的情緒，

很少隔著玻璃或籠俾佢地相見，肥仔很玻璃心，

心情唔好又會打細b婆婆出氣。

兩隻暫托貓來了多日，沒有被肥仔見到，

可能佢聞到味，周圍索。

妹頭剛入室時逢貓必親，現在見到暫托貓會 fee 跟著掉頭走。

想必妹頭已當此家是她的地盤，不歡迎新來者

肥仔第一次見暫托貓女，沒有過去那麼兇惡，

反應也較溫和，難道對貓女有好感

這貓女也是來自繁殖場，幫佢沖涼時，過水好似喼汁咁核突，成身又臭又髒，雙耳每天清潔兩次多日，仍未干淨。

另一貓女也如是，她好像懷孕中，

照咗超聲波，但見唔見到bb, 稍後再驗證，

佢地最終會絕育後給人領養

近兩個月見過近20隻繁殖貓, 全部體重不超過3kg, 

有些更只有2.2kg, 牠們品種理應大隻好多, 原因你明的......

過了發育期, 以後再豐衣足食也難再長大、肥,

牠們自岀世就生活在污糟生銹籠中，受盡剝削，

但仍乖到不得了, 我打開籠門，也不懂行出來，

抱牠岀來, 自己又行入籠, 可悲嗎?

我日日有schedule, 生活仍繁忙，不是去做運動就是做義工，

用腦少咗, 體力消耗大咗，

仍未啲起心肝，去實行辭工時的宏願，收肚腩、 bye bye 肉，

 有時要刻意不安排任何行程一日，留家靜一靜, 

從未養過狗，因為過往怕自己不勝負荷，

近來想做guide dog 寄養家庭，問了資料，表格也填好，

遲遲未寄出，怕自己日日訓練，分身乏術

老虎頭上釘蝨乸

每日兩次派飯，細b婆婆排最後，因為佢吃罐罐特餐，獨自在房慢慢吃，

婆婆吃得慢，吃得快會嘔，

擔心婆婆搶吃被肥仔打嗎？

不用擔心，肥仔吃常餐，婆婆根本睇唔上眼，
佢只是百卦，加上肥仔已餓到乜都唔理，
顧住埋頭苦幹，沒有心機打婆婆，

不過肥仔記仇，好難講佢趁我不在家欺負婆婆。

先派飯俾兩隻肥貓，如果唔係，妹頭喵到你心煩，
妹頭吃得少，肥多多，一路要控制佢食量，避免關節負苛。

大熱天時為何為婆婆著衫，婆婆近日飽受癬患，
幫佢搽藥膏，佢不停舔, 只好幫佢著衫。

婆婆邁向14歲，除了心臟病外，其他機能算ok，

但體重正緩緩地下跌, 每星期跌幾十克, 吃量又差不多, 令我有些擔心，
知道歲月留痕, 我自己亦近來跑步速度慢了，肌肉發唔到力。

婆婆從外表看起來，有明顯老態，經常跳高撻Q，
但以摺耳貓來講, 已超級叻女！

肥保安又出動

好耐唔見肥保安出動, 佢己病癒, 

最近肥保安又忙碌起來，

忙於保衛佢的地盤

隔住玻璃門，也被肥仔的氣埸嚇退

不是加貓, 是暫托

我已退下職場, 開始幫動物機構做下義工、暫托,

貓仔是被繁殖人放棄，剛絕育、剝晒全口爛牙, 剩下4隻門牙,

正在醫治耳疥蟲

現時生活也忙碌，做多咗瑜珈，個會籍一定抵到爛, 跑步會稍減,

加上動物義工、暫托, 

可能稍後會參予另一義務教育, 早前擺烏龍睇錯時間，

拒絕了面試邀請, 正嘗試再安排。

肥仔頭部掃描結果

肥仔已完成頭部CT scan, 結果送去美國解讀已返,

結果不是腫瘤、不是肉瘤，

右眼比左眼有輕微突出，原因不明,

眼角膜有些少發炎, 但不是早前發病原因，

早前右眼後似有硬塊可能是......

免疫系統突然發炎, 因為對類固醇治療有反應。

That's all!

趁麻醉，清洗埋黃甘甘棚牙，

牙齒x光顯示冇蛀牙，牙齦健康冇發炎，保留全棚牙!

好囉！一天光晒！繼續幸福貓生, 蝦蝦霸霸、捱餓減肥😂

肥仔病況

服用抗病毒藥後3天，肥仔情況沒有好轉，

我緊急再帶佢見醫生，醫生懷疑不是病毒感染(即貓瘟), 

是細菌經牙根上到眼後的組織，照過ultrasound 雙眼冇事，

是眼後面組織有事，首先要消炎，再考盧下一部診治找出原因，

醫生開了抗生素＋類固醇，幾日後情況慢慢轉好，

吃到細細粒的干糧，

今日再見醫生，建議照CT scan, 牙齒x光，要麻醉，

才能見到眼後組織，希望不是腫瘤，

因為此診所沒有CT scan, 下星期要轉介到另一診所，

希望只是簡單細菌入侵，肥仔可以繼續幸福嘆多幾年貓生。

病了兩星期, 初期吃唔到乜野, 瘦咗半磅，

平時減極唔瘦, 一病冇咗幾兩肉, 有d心痛。

艱難決定

經過多時掙扎，我已向公司請辭提早十幾年退休，

去年曾主動提岀希望被裁，因為有額外賠償，但被拒.....

好開心.....好開心......

日日將大堆文件棄置於專用袋等回收碎毁，等同將壓力施放，

每次棄置前，望一望項目名稱, 想到以後不用再閱讀跟進這些文件，心情無比舒暢，

每日清理一些，仍有大堆未處理，

每日不停補充交接清單，越寫越長……

辭職後我不能向同事講，要等上司找到人頂我個位才統一公佈，公佈後我的房間一度有幾位同事恭喜我😂😂😂，沒有留戀，反而已調走的舊上司、海外同事在消息公佈後寫給我的電郵令我落淚，我仍不知何時可以離職，仍有程序等批核，仍要交接……

肥仔又病倒了

肥仔年幼時曾發燒入廠維修，維修完之後幾年相安無事，

直到一年多前又來料，吃了一個多月抗生素、抗病毒藥康復，

自此每日早、晚給牠吃含lysine 零吃，勉強應付

http://saibsaib.blogspot.hk/2015/12/blog-post.html

http://saibsaib.blogspot.hk/2015/12/blog-post_19.html

星期五早上給牠奉上早餐，佢不是如常3分鐘清碟，

我知道又出事，給牠罐頭mousse, 佢也吃唔唒，

決定當日下晝攞假帶佢見醫生，佢年紀大了，免疫力不如前，

又開始抗病毒療程，抗病毒藥較昂貴，

上年個醫生分兩次共開了14日藥，

今次個醫生寫了prescription 叫我去藥房買一個月份量，因為診所out of stock, 

我有點懷疑，可能診所mark up 很高，怕嚇走我,

的確此診所收費極貴, 有一段時間我減少幫趁。

慶幸細b、妹頭冇事, 病毒很容易貓傳染貓。

壯膽

妹頭入室一年半，對門鈴聲、吸塵機聲怕得要命，

由最初鐘點一入門到離開一直躲在梳化底，

到現在會蒲下頭，但一開吸麈機又躲起來，

最近一開吸麈機就將佢抱起放在肥仔身邊，

齊齊坐在枱面，佢冇能力自己跳上枱面，

希望佢見到肥仔壯下膽，慢慢習慣吸麈機聲, 

但佢的身體語言告訴我佢仍怕得要命

肥仔一行開，佢又走去躲起來

減肥血涙史

叫佢企係磅上給我影幅磅重中的肥仔，

佢以為我同佢玩，瞓係度影一樣，唔會輕D,

用了一年時間捱餓換取了0.7kg左右豬肪

成效慢，因為擔心造成脂肪肝

肥仔早餐有25g干糧加幾粒零吃

晚餐有40g罐頭加15g干糧加幾粒零吃

其他時候要靠阿媽突然心軟，抵不住肥仔乞求表情，發放多幾粒零吃

餓鬼二貓組

農曆年如往不留港，留下三貓給鐘點照顧，

12月專登帶細b再見醫生，避免耳仔再出事，

鐘點搞佢唔掂，出現去年倒瀉落蟹情況，

鐘點年紀唔細，不能一次過接收太多指令，三貓要將就下，

細b、肥仔冇罐頭吃(妹頭唔吃罐頭），但有"干糧放題"任吃，

肥仔、妹頭已多時冇飽飯吃，終於可以開懷大吃，

出門那天三貓一起上磅，我回家那天再上磅，

一如所料，細b婆婆瘦了，肥仔、妹頭各肥了接近半磅，

我回家第一日肥仔、妹頭又進入減肥療程

餓鬼二貓組

有家毛孩要減肥，流浪貓要自己揾食或靠有心人施予，

餓起上來，肉食貓類也顧唔到咁多，連純澱粉質的中東包也吃，

在約旦遇上很多貓，其中有兩隻令我印像深刻

肚餓吃中東包，是一位小孩拿了早餐提供的中東包給貓吃，

我見到給此貓一些干糧，佢即唔吃中東包

在Petra 上山時遇到一黃貓，因趕路上山，

我放下貓糧即離開，前後只接觸此貓唔夠半分鐘，

回程下山時，此貓遠遠望見我已向我示好討食，

只是很短暫接觸，佢已認得我，求生能力很強

再給牠一些干糧，我又要趕下山，

荒山野嶺，不知貓貓平日靠何為生

貓心臟病

上年年尾帶細b婆婆見醫生覆診耳仔發炎，兩位醫生分別告知佢心臟有雜音，

一位沒有建議我做任何跟進，認為是年老衰退之一，

另一位就建議我找心臟專科檢查，

細b已13歲高齡，見醫生只是找出雜音原因，給予藥物舒緩，

可以做的我會做，不想她一日心臟病發走了，我乜都冇為佢做過

於是上年12月尾打電話預約，碰上心臓專家回老家過聖誕長假要一月尾才回來，

加上醫生已處於半退休狀態，一星期只開診三日，

每日只收兩個症，結果等了一個多月才能見到醫生,

每次貓地身體有毛病，令我對那種病認識全面了，

心臟有雜音可以因爲腎臟問題或甲狀缐問題引起, 

所以要做多種化驗加心臟心電圖、超聲波才能知道病源。

用了兩個多鐘做了多項檢查，

包括血液全面測試、x-ray、心臟心電圖、心臟超聲波，

以一隻13歲出名多遺傳病的摺耳貓來講，

婆婆再次令醫生跌眼鏡，健康情況比醫生預期好，

屬中期心臟隔膜肥大、心瓣有纖維化，心臟比正常大，

現階段醫生建議暫不需要吃藥，吃藥對貓是壓力之一，

半年後再檢查，如惡化先服藥，但仍有機會隨時病發走咗。

沒有腎衰退，膽固醇正常，血壓正常，

關節沒有出現嚴重變型和硬化。

妹頭: I like it!

早前妹頭讓咗蕉蕉俾細b婆婆，

但呢排細b又唔要蕉蕉，轉移陣地去另一貓床，

妹頭也少咗去蕉蕉，改為去新兜，

佢好like新兜，瞓緊都豎起大拇指話好like, 

放心，肥仔瞓唔入，細b又有新歡，冇貓同妹頭爭新兜

20幾度天氣照瞓呢個兜，霸氣宣示主權

奇妙組合

一年前這個組合水溝油, 男尊女卑，

妹頭天天不斷示好，肥仔不領情，

見到妹頭喵喵叫跑向佢，仲要急急腳快走。

日子有功，妹頭的耐性慢慢改變了肥仔，

兩貓也找到令對方舒服相處的方式，

妹頭沒有當初一見肥仔就熱情喵喵叫又挨身挨勢，

肥仔也沒有一見妹頭就掉頭走，兩貓間中會一起，不會好親近，

但不再水溝油，多得妹頭的耐性同不怕吃檸檬

令我感動的是有一天見到肥仔幫妹頭洗頭，

我拿起手機想影時，肥仔唔知係唔係怕醜，停止流頭,

只是繼續含蓄地頭對頭。

十年來從未見過肥仔幫貓洗頭, 第一次呀！