2013年12月30日星期一

Blue Warrior

唔使問都知佢又剛打交來
手下敗將是誰亦無須多講
我家貓社團的大佬......細佬 (別名"方包")
今次我睇唔到為乜又岀口大咬

2013年12月29日星期日

世紀合照 + 賴死唔走

天氣凍,造就世紀合照,雖然只是籮柚對籮柚, 但已是兩姊弟七年首見。

此位置冬天一直是細b一天23.5小時的窩, 藍毯下面是個暖水袋, 我每日更換兩次熱水俾細b婆婆, 婆婆有時都要離開一陣上廁所或落地舒展筋骨, 肥仔乘機覇位, 細b回來見個位俾肥仔霸咗, 只好小心翼翼埋位, 怕一掂到肥仔, 肥仔發老脾唔俾佢埋位, 是日肥仔心情唔錯, 造就此合照。

這是我每晚入房時見到的情形, 我一早preheat電毯, 兩隻仔賴死唔走, 特別卡樂b, 會同我追逐捉迷藏, 希望可以留低, 我是個很輕睡的人, 為了返工有精神, 加上腎病貓卡樂b一定疴夜尿, 要狠心叫佢地起身岀廳瞓, 只有極少情況會留低肥仔或婆婆

2013年12月25日星期三

楊桃

好漂亮的楊桃花, 不是此樹(在家樓下)去年第一次長岀楊桃, 我也不會認識此乃楊桃花。



以前每個星期行山, 曾在西貢大浪西附近的一條村和大潭水霸附近見過楊桃樹, 很高大, 未能睇得清楚。

早前摘咗幾個我高度可及的, 很細粒

放入米缸超過一星期, 味道尚可

樹上的楊桃

另一天拿了把長梯, 哈哈哈......又摘了幾個
正放在米缸醞釀

2013年12月20日星期五

師奶

年尾清假連放三天, 放假一d都不清閒,
 除了不需要天未光就出門做運動之外,
其實每日行程緊湊, 
三日上了4堂瑜珈、
 跑步兩次、
帶卡樂b睇醫生、
自己年度驗身、
中醫覆診、
去幾趟銀行、
按摩三小時、
處理其他私務
再加自己做了兩項小小型家居維修。

多年前裝修, 揀選大門時, 設計師叫我千祈唔好買實木門, 結果揀了半實木, 但仍出事, 
大扇門上端一早有輕微向屋內彎, 天氣濕度變化大時情況會嚴重d, 
導致開關門要大力d拉或推才能關上門。
家中最叻點人做嘢的人有日同我講, "叫人來整啦", 叫阿茂同你山長水遠整咁少嘢,
結果我去五金鋪買了以下的木刨,
自己搞掂。

有人一回家開門就講, "你搞掂個門啦"
對吖, 師奶DIY。



廚房廚柜是裝修時經設計師訂購的, 用料一般,
使用多年的油壓交漏氣再沒有承重能力,
師奶又五金鋪買了以下一對油壓交自已DIY更換了。


用螺絲批拆除了壞咗的交

換上了新交

近十年市面上多數岀售此種撥動式水龍頭, 不同我們兒時使用的扭擰式的水龍頭, 
水龍頭使用久了會岀現滴水, 扭擰式的水龍頭可更換一塊皮,  
如撥動水龍頭出現滴水, 就要更換裹面整個組件, 因家水壓過高, 未裝減壓器前, 水龍頭壽命很短, 兩年左右就岀現滴水, 更換組件當然又係師奶出手啦。

一般庭由男人岀手做的其他工作, 例如更換燈泡、光管、圓頭插蘇轉方腳插蘇, 在我家全由師奶一腳踢

我有少少機械維修天份, 小時候個機械鬧鐘壞了, 我自己拆件想維修, 結果拆完組合唔番, 我一向有尋真的一鼓勁。

卡樂b覆診(7)


又半年啦, 卡樂b就快吃完fortekor的存貨, 
考慮了很久, 最終決定帶牠去睇Dr. Maggie, 雖然路途比較遠,
事前準備好牠近三年的所有lab reports、每日的中、西藥物、餐單。

是日在我們前面的症很簡單, 我地準時見到醫生,
因第一次見, 醫生俾的資訊我都知道,
例如腎指數超標, 並不一定代表腎有事, 可能是近日所吃食物所致,
就算腎有事, 也不一定要吃fortekor, 除非尿中有蛋白,

卡樂b以上各樣均中, 未確診前, 相隔10天驗了兩次血, 均顯示腎指數超標,
早期未吃fortekor前, 尿中有蛋白, 吃了一段時間後, 尿液中才沒有蛋白,
 證明腎臟的損壞已到影響到牠的生存

今次見Dr. Maggie 主要是補充未來4個月要吃的fortekor,
醫生叫我過了聖誕再帶卡樂b去診所, 留低全日照超聲波和做其他檢查
睇下過去三年腎臟內的cysts有沒有增大。

坦白講, 是次見醫生有d失望, 不過亦明白醫生第一次睇卡樂b症的保守,
既然已選擇, 亦無謂反反覆覆再去他選,
一月頭再請假帶卡樂b去檢查。

開餐中的卡樂b



陪媽媽坐按摩椅





2013年12月14日星期六

細b...我曾年輕過

兩個月後細b就踏入十歲, 走了貓生大半, 我和老公相信牠會長壽,
源於牠的生活習慣, 少吃、精吃、瞓得最多,
小時候有獸醫批牠可能過不了五歲,
隨年齡漸長, 牠的行為亦有轉變,
早年牠很少主動坐我大脾,
現在我一坐下, 牠見細佬、卡樂b不在我身邊, 牠不喜歡和兩隻仔爭媽媽
牠會主動走來坐我大脾打咕嚕
(仔仔媽, 唔好灰心, 天師仔遲d會主動坐你大脾)

貓不同人, 老咗唔會有皺紋、白頭髮, 但面部神態其實在慢慢轉變中,
因日日相對, 很難察覺,
回看細b年輕時的照片, 知道阿女老咗很多。

一歲半時, 細佬未入門

兩歲半時, 細佬仍未入門



2013年12月7日星期六

御用浸腳陪客

 三貓中卡樂b係最懂同人交際,
正一交際佬一個,
所以我稱牠為貓界CEO,
懂得同人交際, 令牠有機會脫離流浪貓之列,
為自己賺取終身飯票、不需要供款的MFP、medical insurance,

雖然一早已上岸, 牠仍努力工作不懈, 絕無偷懶, 
細佬、細b 都沒有卡樂b咁勤力進取, 

卡樂b每晚陪伴我浸腳, 坐大脾



跳上背上, 被牠踩下踩下幾舒服

不特止踩背, 為了表示牠對我之愛, 用舌舔我的頭髮
(我從沒有染髮, 過多一兩年睇怕要向現實低頭)

老公大部分時間不在家, 一回家卡樂b即開工,
不停用頭擦他, 又嘗試騎上他膊頭用舌舔他的頭髮, 怎麼叫我們不愛牠

2013年11月30日星期六

某一晚上 + 雜聊


某一晚上, 不想再坐在書房睇片,
拿了notebook 上床睇, 
肥仔立即跟上床反肚咕嚕咕嚕咋嬌,
所以話有貓的家真好。


卡樂b去咗邊?
在牠日日打躉的好位置大覺瞓


細b 當然長期留在佢的御用兜

停了半年沒有天天吃中藥調理(之前吃了一年多換了三個中醫),
老毛病再浮現, 再回復天天吃中藥調理, 
聽取我的中醫意見, 
早餐改吃飯、減少吃生果, 晚上睡前浸腳,
卡樂b每晚都跳上大脾陪我浸腳, 乘機咋嬌


又番炒......生炒糯米飯, 
我好鐘意吃, 但我體質其實不能多吃, 
以後要減少吃糯米飯。
為了身體健康, 我犧牲很多喜愛的食物,
戒辣、冷飲、雪糕、魚生、多種生果.............
唯不肯戒咖啡、甜品

2013年11月23日星期六

年度大掃除


我愛乾淨, 但絕對沒有潔癖, 

我認為人要與冇害的細菌共存, 

所以我唔用滴露洗手

現時很抗拒服用抗生素, 除非個別情況,

更不會傷風感冒睇西醫吃五顏六色的7、8種藥、咳藥水

全屋窗簾一年洗一次, 

估下有三貓的我幾耐換一次床單、被套, 

梳發套更加超過4年沒有洗, 到最近才洗, 

因為被卡樂b爪到冇眼睇, 所以費事洗, 

自相矛盾.....嘻嘻.....又話自己愛乾淨,

窗簾要分幾次洗, 干了等鐘點燙下先掛番, 

每年11-12月開始睇天氣、 睇心情, 開始每個週末做小小, 

唔使迫埋農曆前做餐死,

洗完曬乾中, 

細佬、卡樂b最愛搞搞震、冇幫趁,

 要喝停佢地唔好再玩捉迷藏。








有天晚上影下細佬的巨躉 + 小豬尾
細佬的減肥大計最近完全沒有進展,
雖然繼續吃減肥糧, 但沒有再瘦下去,
今日早上維持6.66kg (14.65 lb)

2013年11月16日星期六

任人魚肉

因為阿媽上星期懶, 
用手寫板寫得慢, 唔想寫太多字, 
所以沒有將細佬以下出巡的驚青相放岀來



坐陌生人大脾, 眼神驚驚




任人搓圓禁扁


但一回到屋企附近, 牠認得路,
 自己掙扎不要我抱, 要落地自己行, 
即回復自信, 行在我前面, 
懂得那里要轉彎, 沒有行錯去別人家門, 
直至到家門前停下等我拿鎖匙開門, 
肥仔記性唔錯

2013年11月9日星期六

細佬年度出巡

我其實最愛帶肥仔細佬出街, 
不是因為牠肥頭dup耳得意, 
而是牠在家和岀街是兩隻貓樣

在家自信十足, 串串共, 抱多一陣都唔制

岀街除了變庵春之外, 牠會好似樹熊咁貼身膏藥雙腳扣住我條頸付在我身, 
 任人魚肉, 包括任何陌生人, 

知道牠很驚, 所以唔敢亂郁動, 所以只外岀一陣就收隊, 
除了去診所, 極少帶牠外岀。

佢細個時, 曾想過帶牠去做動物醫生, 但又覺得牠在家性格剛烈, 打消念頭。





2013年11月3日星期日

早餐

我很少吃此類早餐,  平日早餐都是匆匆忙忙,  坐在公司寫字臺完成, 我雖然很早起身, 但因為早上要運動、沖身, 所剩時間不多。

不是食物質數, 純是個人喜好, 我喜歡腸粉、炒麵、炒米粉、燒賣、公仔面、豬扒包、糯米飯............加奶茶或咖啡, 亦愛馬來西亞多元化的早餐, 大舊媽寫過一篇blog介紹她的早餐, 我每次一想起那篇blog中的食物, 會狂吞口水。


此份早餐HK$48, 吃得岀很用心做那杏仁酥, 不是好似 Dxxxxxxxx一味多牛油, 很干身、脆,  奈何香港鋪租、人工昂貴, 要支持營運開銷和有營利, 價錢不會低

雖然好味亦負擔得起天天吃, 但我不會覺得很折墮, 自少的危機感令我珍惜、小心理財, 當然我會適當照顧自己的身心, 外表的虛榮一早不上心, 當我進入此狀態後, 我好像在高處俯瞰親戚、同事、鄰居.....行徑, 好好笑。
我沒有包括(好)朋友, 因為我有權選擇

周末早餐, 我多數選擇以下不太健康的食品去中和我平日靠意志力、理性抑壓的食物選擇。

2013年10月30日星期三

卡樂b又闖禍



細佬專長是開柜門, 

喜歡將家中所有衣柜、鞋柜、儲物柜打開來打發時間, 
天躲入衣柜大覺瞓。

這是家中其一鞋柜最低三層, 晚上被細佬打開後, 
卡樂b將老公的鞋拖落咬斷鞋帶兼吃下肚, 
速度快到你唔信, 
自卡樂b入門後, 牠不知吞下多少條我兩公婆、客人的鞋帶, 
所以我們入屋後一定將有鞋帶的鞋放入鞋柜避難, 
道高一尺, 魔高一丈,
卡樂b乘 漁人 (肥仔) 之利, 連放在鞋柜內的鞋也避不過牠的口癮。

我地遲d要重整鞋柜, 將有鞋帶的鞋再放高d去避難

吃落肚的鞋帶、橡筋圈、膠袋、紙皮、碎布去了那里?
有時隨大便排出, 
有時嘔吐岀來,
這是卡樂b嘔吐出來的上面藍布鞋的一截鞋帶, 
連同早一晚我force feed的蛋白

同1128的翩翩一樣, 卡樂b愛咬布, 
特別是老公T-shirt格拉底位置,
經常被卡樂b咬穿兩個大窿, 好涼爽吖

卡樂b其中一戰利品

老公很感謝卡樂b, 全靠牠幫他報消了約10件T-shirt, 他有籍口買新衫
每次除下衫, 一定要收藏好, 一被卡樂b發現就完蛋啦。