細b淋巴癌...「康復」

想寫此篇blog好耐，懶開有條路，

以下純分享我由獸醫所收到的訊息，

不能取代獸醫的診斷、意見，

只能給貓友參考，不幸碰上時也不會不知如何處理

怎樣發現細b患上淋巴癌?

細b自多年前確診心肌肥大症後,

就需要每半年照一次心臟超聲波、驗血以睇吓惡化程度，

以決定要否服藥以舒緩不適，令牠繼續有生活質素，

醫生也會數下呼吸次數、摸下身體各部位，

當醫生摸到下巴時，發現牠淋巴腫脹，懷疑係淋巴有事，

問我會考慮抽針化驗，抽針化驗結果懷疑是淋巴癌,

但不能100%肯定，醫生建議要肯定的話，

就要麻醉割後腿後的一粒淋巴去做biopsy, 

biopsy結果確定係淋巴癌

淋巴全身都有，即任何位置、器官亦有可能有淋巴腫瘤，

細b除了下巴兩側腫脹，後腳、胸部奶頭附近亦有淋巴腫脹，

基於年紀老邁，醫生建議用較溫和的方式延長壽命、

舒緩不適，可以化療

淋巴癌化療藥有兩種（note:不同癌症可能用不同的化療藥）

• 定期到診所打化療針; 或
• 定期（每三星期）在家餵化療藥（note: 化療藥是毒藥，不可直接用手接觸，帶一次性手套才餵）: 加上
• 每日服用類固醇抑制免疫系統

因應貓性格、年紀等選擇用一方式化療

定期驗血以確保紅血球能夠支持化療，

如果紅血球、血色素過低，要停止化療，

如果病情穩定, 驗血的頻率可慢慢拉長,

由開始時每一兩星期至現在約三個月一次

貓的化療副作用有別於人, 不會甩毛、口腔潰爛,

只會很疲倦，成日訓

胃口也可能受影響, 細b經常罷食, 需要用針筒強餵,

如果只靠貓自已進食，可能不能維持體重, 

也不能製造足夠紅血球去抵禦化療

細b已化療一年半, 今個月初的覆診醫生話已康復，

身上淋巴已不再腫脹

但終身要繼續服用化療藥和類固醇, 因為怕復發

一般貓在化療頭幾個月效果較明顯, 

但細b一路對化療沒有大反應, 只是淋巴腫瘤大小維持不變,

化療一年後才慢慢縮小, 不要太早下判斷

照顧老貓的小小心得

紅、黃色暴雨警告下, 最好在家寫blog做紀錄,

與家有老貓blog友交流下, 互相學習，

細b有病在身, 仍肯自己進食，但胃口時好時壞, 

多數自己吃一半, 一半靠我強餵,

為了方便用大針筒(60ml)強餵, 一定要先將食物打成蓉, 才能用針筒餵,

我用此種攪拌機, 馬力400w, 太細馬力打得不夠爛,

晚餐有吞那魚罐頭、水, 蒸雞柳碎、南瓜蓉、lysine powder, taurine powder, 

打一分鐘左右就成蓉, 要用矽膠抹刀划出, 如果唔係, 會殘留很多蓉在攪拌容器

細b吃唔晒, 要再加少量水稀釋, 用針筒吸完強餵

不要以為市面上有些罐頭寫明 xxxxx paste 可以直接用針筒餵,

事實上所謂paste 的肉醬是粗粒, 針筒不能直接吸入,

早前餵妹頭Hill's K/D 腎罐 paste with chicken 也先要加半罐水溝, 用細網篩加匙羹磨,

隔完的濃液才能用大針筒餵, 但妹頭從不吃濕糧, 只餵了一大罐就轉回Renal Liquid,

60ml 大針筒不是間間藥房有得賣, 藥房多只賣25ml 或以下針筒,

大針筒吸咀分兩種，一種如圖下左邊, 窿口較大，

另一種方便插針, 窿口較細, 不能用作餵食用,

圖下右邊是我在FB見到有朋友使用, 是擠奶油用,

買來一試(係citysuper 用$80 買完, 先發現taste有類似的$38),

好處係不用將食物磨成冇渣的蓉, 罐頭paste 加水攪完可以直接倒下圓筒使用,

但操作上沒有針筒咁利落，

可能我先入為主，已習慣用大針筒

廚餘清道夫

有位老伯任職廚餘清道夫多年，由年輕做到老，

餐揾餐食，冇乜儲蓄，

想轉份有多d保障既工好耐，但點同後生仔女爭，

每天在網上求包養的多不星數，要後生的有，要靚仔過佢有，

只能怪少壯不努力 老大徒傷悲

現時顧主對老伯好刻薄架，每日兩餐，

早餐只有25g冇貓肯吃的剩餸，唔使半分鐘清晒，

一日時間流流長，要等到晚上才有嘢落肚，

晚餐80g 細罐加水填飽肚子直到第日早上，

其他時候睇運數，時運高時有些廚餘打賞，老伯視之為甘露，飛撲去清潔,

鬼叫年紀大先諗轉工，邊話咁易，

貓界勞福局長建議肥嘢搵貓奴介紹署試下換顧主，

個個貓奴一聽到13歲高齡，見到個樣蠢蠢頓頓, 又見佢CV有多次打交紀錄, 邊冇貓奴肯落搭，

於是肥伯自拍此宣傳短片希望有貓奴垂青佢的認真工作態度，

連在地上的一小點廚餘也清潔頗當，貨真價實

兩老

已屆15歲的細b, 身患淋巴癌和心肌肥大症

接受化療快8個月，紅、白血球仲頂得住，

可能日日早、晚用針筒餵兩老淮山杞子紅棗水幾年, 日子有功,

胃口時好時差, 好彩佢肯俾我用大針筒餵食, 體重保持4kg以上,

不清楚其他癌症是否用相同化療藥, 

化療對動物的副作用沒有對人那麼可怕,

冇甩毛、冇潰爛,

腸胃不知是因為化療亦年老關係, 大便尾段總是爛, 也很臭,

醫生建議餵pro-kolin, 開頭有些作用，兩星期後又回復舊態,

終極方法溝南瓜蓉落濕糧, 但佢自己只吃些少,

我要用大針筒餵

肥野13歲, 身體強壯, 大力如牛,

體檢結果靚靚, 仍可以一下由地面跳上檯, 

日日吃唔夠飽, 會幫手清細b的下欄

家中乜糧佢都肯吃, 腎糧、老貓糧、減肥糧、腸胃糧,

混合幾種糧炒埋一碟又得, 唔會腸胃唔適應，最緊要飽肚

吃飽搵個心水位尋夢去

妹頭最後日子

病發前幾日

病發後三星期將餵食喉嘔出兼咬斷, 只好拆喉回家, 

希望能自己恢復進食和一邊腎功能

在藥物輔助下, 自己恢復進食和一邊腎功能

 精神很好

經常孖住肥仔

一個多月後, 雖然仍有藥物輔助, 又拒絕進食, 

開始每日多次強餵renal liquid一個半月,

再加藥物也起不了作用

臨走前幾天, 大部分時間昏睡, 嘔吐次數增加, 

發展至大小二便失禁,

媽媽知道係時候放手

妹頭走了

抗病98日, 妹頭太赲了......

十年前的三月份，我家只有兩貓,

十年後的三月份, 仍是那兩貓, 兩貓加了十歲，步向暮年 

只能給妹頭三年半的入屋生活,

多年吃盡街頭苦頭，令其驚青怕陌生人,

但又造就其堅強性格、圓滑社交手婉,

令肥仔忌佢三分, 不曾欺負佢, 甚至試過肥仔阻住佢向我討食發脾氣鬧肥仔。

平日照顧佢最省時, 亦可能導致佢的病,

不肯吃濕糧, 不肯被餵水, 不肯擦牙。

妹頭，你沒有如我所望, 健康長壽,

願你在另一空間，有番齊四腳行走, 沒有病痛,

媽媽永記你的乖巧醒目。

近況

終於完成了16個月的育狗生涯，

當然是個難忘的經驗和回憶，

甜酸苦辣乜都有，

一路碰到不少人問我，會否隻狗離開後再做幼犬的寄養家庭，

我早在一年前已經說不會了，

幾個原因令我如此早決絕下定論，

有他人的原因，有個人的，

不方便在此公開他人的原因，只能說說自己的，

個人體力的負荷，可以hea做，但不是我的性格，

認真起來就令自己辛苦，

可以幾辛苦，唔做過不會明白；

第二，生活上失去我過往的自由，

這幾天我享受回自由，那種快感不能形容。

曾經想過退休後收養一隻狗，

寄養一年多令我打消念頭，

不是我不愛狗，原來我仍未做好養狗的心態準備或是愛得不夠深。

同隻狗共處近500日，有沒有不捨？

有，最痛苦是知道牠將要離開的第二個星期，

牠離家時我沒有哭，

只在最後分別時一抱眼紅了。

現時多了自己的生活和時間照顧兩病貓,

細b已接受化療超過半年，病況仍穩定，

妹頭病情曾一度好轉一個月, 已超過一個月拒絕進食，

靠每日灌renal liquid、打水、食多種藥維生,

生命正倒數中。