妹頭最後日子

病發前幾日

病發後三星期將餵食喉嘔出兼咬斷, 只好拆喉回家, 

希望能自己恢復進食和一邊腎功能

在藥物輔助下, 自己恢復進食和一邊腎功能

 精神很好

經常孖住肥仔

一個多月後, 雖然仍有藥物輔助, 又拒絕進食, 

開始每日多次強餵renal liquid一個半月,

再加藥物也起不了作用

臨走前幾天, 大部分時間昏睡, 嘔吐次數增加, 

發展至大小二便失禁,

媽媽知道係時候放手

妹頭走了

抗病98日, 妹頭太赲了......

十年前的三月份，我家只有兩貓,

十年後的三月份, 仍是那兩貓, 兩貓加了十歲，步向暮年 

只能給妹頭三年半的入屋生活,

多年吃盡街頭苦頭，令其驚青怕陌生人,

但又造就其堅強性格、圓滑社交手婉,

令肥仔忌佢三分, 不曾欺負佢, 甚至試過肥仔阻住佢向我討食發脾氣鬧肥仔。

平日照顧佢最省時, 亦可能導致佢的病,

不肯吃濕糧, 不肯被餵水, 不肯擦牙。

妹頭，你沒有如我所望, 健康長壽,

願你在另一空間，有番齊四腳行走, 沒有病痛,

媽媽永記你的乖巧醒目。

入屋兩週年

兩年前的今天，妹頭帶著一身未痊癒的刀傷來到此家開始休養，

記得咁清楚，因為卡樂b在妹頭到步前一個月走了，

兩年來未能忘懷.

短短幾十字, 我要分三次寫,

手機wallpaper仍是卡樂b, 每次講起、想起牠, 仍是雙眼通紅。

攝於離開前一個月，完全不像患病4年半的腎病貓，
到走時從未需要打水, 但完全沒有脫水情況，
全靠自己好生性不停飲水，怎能忘記牠.............

3.8kg 肥妹

妹頭雖然得3.8kg, 仲輕過細b少少，但骨架細，

成隻圓碌碌，見唔到、摸唔到有骨。

每日兩餐，每餐只給牠17g 減肥糧, 仲要用電子磅量度，

17g 有幾多，少得可憐，

暫托貓女每餐最少30g, 任食，因為要增肥變靚D，

肥仔每餐也只有约20g , 但會吃濕糧，

妹頭不肯吃濕糧，缺少一隻腳，令佢活動能力大大減少，

加上開始步入中年(约7歲)，越來越難控制佢體重。

壯膽

妹頭入室一年半，對門鈴聲、吸塵機聲怕得要命，

由最初鐘點一入門到離開一直躲在梳化底，

到現在會蒲下頭，但一開吸麈機又躲起來，

最近一開吸麈機就將佢抱起放在肥仔身邊，

齊齊坐在枱面，佢冇能力自己跳上枱面，

希望佢見到肥仔壯下膽，慢慢習慣吸麈機聲, 

但佢的身體語言告訴我佢仍怕得要命

肥仔一行開，佢又走去躲起來

餓鬼二貓組

農曆年如往不留港，留下三貓給鐘點照顧，

12月專登帶細b再見醫生，避免耳仔再出事，

鐘點搞佢唔掂，出現去年倒瀉落蟹情況，

鐘點年紀唔細，不能一次過接收太多指令，三貓要將就下，

細b、肥仔冇罐頭吃(妹頭唔吃罐頭），但有"干糧放題"任吃，

肥仔、妹頭已多時冇飽飯吃，終於可以開懷大吃，

出門那天三貓一起上磅，我回家那天再上磅，

一如所料，細b婆婆瘦了，肥仔、妹頭各肥了接近半磅，

我回家第一日肥仔、妹頭又進入減肥療程

餓鬼二貓組

有家毛孩要減肥，流浪貓要自己揾食或靠有心人施予，

餓起上來，肉食貓類也顧唔到咁多，連純澱粉質的中東包也吃，

在約旦遇上很多貓，其中有兩隻令我印像深刻

肚餓吃中東包，是一位小孩拿了早餐提供的中東包給貓吃，

我見到給此貓一些干糧，佢即唔吃中東包

在Petra 上山時遇到一黃貓，因趕路上山，

我放下貓糧即離開，前後只接觸此貓唔夠半分鐘，

回程下山時，此貓遠遠望見我已向我示好討食，

只是很短暫接觸，佢已認得我，求生能力很強

再給牠一些干糧，我又要趕下山，

荒山野嶺，不知貓貓平日靠何為生

妹頭: I like it!

早前妹頭讓咗蕉蕉俾細b婆婆，

但呢排細b又唔要蕉蕉，轉移陣地去另一貓床，

妹頭也少咗去蕉蕉，改為去新兜，

佢好like新兜，瞓緊都豎起大拇指話好like, 

放心，肥仔瞓唔入，細b又有新歡，冇貓同妹頭爭新兜

20幾度天氣照瞓呢個兜，霸氣宣示主權

奇妙組合

一年前這個組合水溝油, 男尊女卑，

妹頭天天不斷示好，肥仔不領情，

見到妹頭喵喵叫跑向佢，仲要急急腳快走。

日子有功，妹頭的耐性慢慢改變了肥仔，

兩貓也找到令對方舒服相處的方式，

妹頭沒有當初一見肥仔就熱情喵喵叫又挨身挨勢，

肥仔也沒有一見妹頭就掉頭走，兩貓間中會一起，不會好親近，

但不再水溝油，多得妹頭的耐性同不怕吃檸檬

令我感動的是有一天見到肥仔幫妹頭洗頭，

我拿起手機想影時，肥仔唔知係唔係怕醜，停止流頭,

只是繼續含蓄地頭對頭。

十年來從未見過肥仔幫貓洗頭, 第一次呀！

爭奪蕉蕉

不明白各貓對蕉蕉的喜愛, 

蕉蕉的末端啡色蕉蒂一早被卡樂b咬爛，

由我修補繼續使用，

天氣凍了, 為細b穿回同一件衫, 佢又回歸蕉蕉貓床,

過去幾個月蕉蕉已成為妹頭基地, 

見到基地被霸占，妹頭只好望床避走, 好好脾氣, 下次早d霸位囉

第二日, 妹頭 一早霸咗位, 細b遲到, 

兩貓爭位, 邊個贏?

妹頭適應室內生活

妹頭入室一年多d，慢慢適應室內生活，

由開頭我一行近就不停喵、飛機耳、身體收縮，

不斷進步，不會期望佢有一天像肥仔咁對人傻呼呼，

只要不再經常自己嚇自己，躲到梳發底,

見到佢的進步，對我來講，除了欣慰，亦有滿足感。

妹頭吃飽後會開心碌地沙

見到我行過，想人關注佢，會大大聲喵引人注意

除了長駐卡樂b以往的寶座-黃色蕉蕉，亦會諗計跳上其他貓兜

今天下午氣溫仍有27度，

細b、肥仔已進駐貓床、人床嘆世界

牠是誰？

昨晚收到由義工傳來的相片，是義工在舊相片中無意中尋到，

叫我認下是否妹頭，老豆一眼話係，

謝謝義工傳來照片，等我們知道多D關於妹頭的背景。

相片攝於2012年12月11日，當時妹頭剛被cccp義工在長沙灣捉去絕育剪耳，

因為是貓女，義工將絕育後的貓女困籠留家幾天觀察傷口癒合，

一切正常幾天後放回原居地，

因為此背景，妹頭被人砍斷後腳，切肚皮才能獲救，有安穩下半生。

決定每年12月11日為妹頭生日，出生於2011年啦

落難細路仔

親戚出門又再有求，靚仔細路又來我家寄宿，

講明困籠，肥仔的大爺、妒忌、霸道、歇斯底理抗拒脾性，冇貓有，

只有妹頭抵得諗，日挨身夜挨頭，不怕日日吃檸檬，

經過多時肥仔最終勉強收貨

靚仔已來了多日，肥仔變身保安，

日日夜夜不停巡邏，徘徊籠前fee, 鬆尾，或坐在籠前瞓，

甚至伸手入籠打靚仔，不放心地盤被侵佔

我曾放靚仔出籠行一陣，被肥仔𥄫到，

即時衝前打、咬靚仔，靚仔避走入籠避難

5.26pm, 接近晚餐時間，三貓入廚房等吃，妹頭打頭陣

一分鐘之後，輪到肥仔，大家可見分別

每次拿出此籠，思緒不斷，

此籠是2009年3月為準備收養卡樂b而購買，

去年3,4月靚仔來寄宿，卡樂b仍在生，轉眼卡樂b已離開一年了

夏日炎炎

近來天氣實在太悶熱，連早上6點跑步也頗吃力，

工作繁忙，有時過了晚上十一點才瞓，

要早上5點半起床跑步很辛苦，夜晚跑步要早收工才夠時間, 

我仍堅持戶外跑步，抗拒走入冷氣健身室, 健身會籍只用了一半價值,

放假會跑超過一小時戶外, 沒有帶水樽, 

熬過這種熱, 情緒不會因為天氣酷熱發牢騷

為了平衡環保、生活質素，我沒有長開家中多部冷氣，高峰時也只是同時開兩部,

為了毛孩, 出門前較好時間制，3部風扇輪流運作至我回家，

其中一部冷氣由中午十二時開始運作給三貓消暑至我回家，

我回家之後改開另一大匹數冷氣，

我家是用三相電熱水爐，只有煮食用煤氣，

不要以為我家電費很貴，同一般小家庭差不多。

夏日炎炎, 有乜好過妹頭吃完早餐，嘆住冷氣曬太陽洗白白

妹頭同肥仔相處有進步，熱情稍減，肥仔較易接受, 

沒有開頭咁抗拒, 見到妹頭行近即調頭走佬

終於集齊

只此一次，好快又散水

睇下妹頭瞓得幾放鬆

D爪放開晒，睡姿豪邁

兩情相悅？

兩情相悅？
錯覺？

這畫面是偶然，
每次我準備離家，肥仔一定未走先知，

跑到門口曬腩，希望我會搓幾下腩、又拍打一輪才滿足，

妹頭一向坐在遠處望著，不敢加入，

直至有天見肥仔碌來碌去咁爽，放下介心行近加入碌地沙，

開心見到妹頭慢慢繼續放鬆做家貓。

此幅相清楚見到妹頭肥咗好多和後右腳被截肢情況，

為了幫妹頭減肥，妹頭現在跟肥仔一樣吃處方減肥糧，

因為牠完全不吃濕糧

排排坐

天氣終於回暖, 細b卸下著了接近半年的冷衫，

我收起貓床、毛毯, 拿岀去年購入放A4文件的膠兜, 

再內放兩個重疊A4紙箱蓋, 即三重保障, 

因為兩個重疊紙盒也很快俾隻肥嘢瞓到變型,

經常要從公司拿紙盒更換,

現在唔怕變型

三個兜, 獨欠肥嘢，佢去咗瞓地毯

跑步多年，路線一樣, 

今日改變路線, 來回跑了超過8km, 沿途仲有靚景

Sit up

模仿成功減肥的肥貓sit up

注定冇得救

吃了多個月減肥糧，最多瘦了半磅，

媽媽一岀門又打回原型

妹頭天天尾隨肥仔希望有伴

放鬆晒太陽

妹頭終於放下介心, 懂得學細b、肥仔咁享受貓生、晒下太陽, 不用擔驚受怕。
近來對鐘點也沒有初頭害怕, 躲完一陣會浦頭，
再躲再浦頭，重重複複, 好過開頭躲到鐘點走了才敢浦頭。

過去一星期天色麻麻, 這是攝於上一星期日, 陽光普照，氣溫和暖 

努力沖涼中, 

相片其實我隔住玻璃影的, 因為我一行近，佢就有d驚跑開。

每餐18g份量

每日18gx2份量

流浪唐貓艱苦的生存環境令基因演進, 體型骨架細，食物消化轉能效率很高。

這是肥仔減肥糧一日40g份量(早餐25g+晚餐15g), 另加晚餐40g罐頭 (即半罐細罐頭加水)

多嘴妹

妹頭是個多嘴妹, 做乜都大聲喵喵叫,

吃嘢前叫到直至放下佢個飯兜, 但不要以為佢肚餓或大吃，

佢只吃少少就停口，一餐20g干糧分三、四次才吃完, 

一日兩餐共40g干糧加10粒超市零吃, 

不吃雞粒、三文魚粒、魚柳、雞柳、網購的美國零吃、歐洲超市買的零吃.......

肥仔、細b超愛的牠通通聞完即棄, 

咁少食量仍不夠半年肥咗一磅半,

上星期開始減10%干糧至每日36g, 零吃減半, 

希望妹頭不要步肥仔後塵吃減肥糧。

三腳無阻牠生活，只是跳高受限, 暫時只見過牠跳上梳發、床,

懂得將被截肢的後腳放在茶几腳上借力跳上梳發，

原理好似短跑運動員起跑時的腳踏咁, 間中仍見佢撻Q。

網購時見到此模仿貓媽媽交著貓b的夾子, 據聞可舒緩貓地緊張情緒, 

曾在fb見過, 即管買來一試, 這類產品效果見貓見智, 不要太認真，

例如廣傳的日本神奇水兜, 在我家就發揮唔到作用, 不是想倒米, 實話實說。

測試妹頭在吸塵機噪音下反應

妹頭愛哥哥

妹頭性情好好，很愛同類，

一有機會，就會主動接近肥仔，靜靜坐在一邊，

見肥仔沒有抗拒，會不時挨頭向肥仔示好，令我好安慰, 

今天是妹頭入室５個月。

睇下妹頭幾陶醉

雖然兩貓不會攬頭攬頸一齊瞓，

妹頭的平和，不計較吃咗好多檸檬，將肥仔呢隻牛精王馴服了不少，

肥仔少咗戾氣，已很少見肥仔追打婆婆。

當年領養卡樂b後，親戚見卡樂b雖然是流浪貓，但性格是不怕生的公關貓，

我建議親戚嘗試領養，親戚回應可否領養到好似卡樂b咁親人的貓，這當然不能保證，太過計算永遠不能踏出第一步, 也不會得到意外驚喜,

結果親戚一家先後購入3隻貓。

名種貓的性情夠親人溫和，但也不一定買中你想要的prototype,

每個人有自由選擇自己的喜好，

撫心自問，論外貌，名種貓優勝過唐貓，

我認為一般人一生可飼養的動物quota有限，

對流浪動物的憐憫愛護令我決定放棄個人喜好，幫助此弱勢羣組, 

牠們給我的回報往往意想不到。